Tags
Related Posts
Share This
La Patrie dal Friul/Agosto
Su “La Patrie dal Friul” di questo mese, la mia intervista a Roberto Cozzarini. Pioniere alle paraolimpiadi di Seul e friulano di San Giovanni di Casarsa. Roberto Cozzarini al è un zuiadôr di ping pong. Ma no un zuiador cualsisedi. Roberto al è poliomelitic di cuant che al veve 14 mês e al à scuviert il zûc dal ping pong intant di un progjet di riabilitazion che al veve ancje il sport. Roberto al è furlan di Pordenon, anzit di Sant Zuan di Cjasarse e al à vude la furtune di partecipâ aes primis olimpiadis par atletis cuntune disabilitât, chês di Seoul 1988. Cumò, a 61 agns, si è ritirât de ativitât sportive ma nus conte cun plasê la sô esperience di pionîr des paraolimpiadis. Roberto, tornìn indaûr ai zûcs Olimpics dal 1988 in Koree. A son stâts i prins zûcs dulà che i atletis disabii a àn garegjât tai stes implants dai atletis normodotâts. In Koree o vin cjatât une sensibilitât uniche sul teme de disabilitât. La Organizazion e veve ancje metût sù une specie di “Vile Olimpiche” pai atletis disabii là che ogni struture e jere pensade su misure par vignî incuintri aes nestris esigenziis. Miôr che in Italie, insome. Fa sport par un disabil nol à di essi facil. Cumò lis robis a son miioradis e o vin fat gruessisins pas indenant. Ce che al continue a mancjâ, plui che lis struturis dulà zuiâ, a son lis societâts sportivis che a promovin ativitâts pai disabii. E pûr il sport, lu disin ancje i miedis, al è fondamental cuant che si tabaie di disabilitats. E je vere, al è fondamental. Soredut cuant che la disabilitât ae rive indevant cui aigns, cuant che, insome, no tu nassis disabil ma tu lu deventis par un incident o une malatie, il sport al riviestis un rûl essenziâl ancje pal sbloc psicologjic. Pense che tal nord Europe, ancjemò prime di scomençâ la riabilitazion, di metin suntune “sedia a rotelle” e ti fasin zuiâ di ping pong. Jo o ai scomençât tart ma par me il sport al è stât fondamentâl. E ti à permetût di fâ plui di cualchi biele esperience ator pal mont. Cualchi anedoti particolâr des tôs paraolimpiadis? Un sì, verementri particolâr. O sin a Seul, invidâts a cjase dal consul talian, insieme a dute la scuadre taliane. Une zovine che e jere cun nô mi clame e mi dîs “Roberto, ven chi che al è un siôr che al à voie di fevelâ par furlan cun te”. O cognòs cussì un furlan che al faseve il responsbil pe AGIP in dut il SudEst asiatic e che mi dîs: “In Koree a son 40 milions di abitants, 40.000 soldâts americans e nome doi furlans: jo e une frute che e lavore in ambassade.” Beh, ta chel moment o jerin almancul in trê. Trop ti sêstu sintût furlan ator pal mont? Cuant che tu sês cu la scuadre dal to Paîs, tu sintis di rapresentâ la Italie. Però in chê squadre almancul in cuindis o jerin dal Friûl e jo mi soi simpri sintût furlan al cent par cent. O ven di une tiere di confin tra Venit e Friûl ma o ai simpri fevelât nome par furlan o il talian cuant che no mi fasevi capî in marilenghe, cence nissune altre contaminazion. Grazie Roberto, al è biel pensâ che un toc de nestre Patrie al vedi scrit une biele pagjine de storie dal sport. Grazie a voaltris e Mandi. Anzi: Mandi e si viodìn! Simone Bressan